CCLXXXII.

1393, Januar 30. Schloss Glatz.

Stephan Poduszka, königlicher Hauptmann zu Glatz, bezeugt, dass die Frauen Gytta Beringen und Gela Runge eine Lehnhufe zu Merzdorf und das Angefälle zu Heinzendorf an Frau Anna, Heinrich Weise's Ehefrau, verkauft haben.

Ich Steffan Podusska von kunglicher gewalt haubtmanne czu Glocz vnd meines hern des kunges monne, dy hernoch czu gezeuge geschriben steen, wir bekennen offintlichen mit desem keynwortegem briffe allen den, dy in seen, horen vnd lessen, das vor vns vnd vor ein gehegtem dink komen sint dy erbern vrawen, vrawe Gytta Baringinne vnd vrawe Gela Ryngin, gesundes leibes mit volbedochtem mute, mit gutem rathe irre frunde, vnbetwungen vnd haben vorreicht vnd vorlangit eyn hube leen gutes in vnd (uf) dem dorffe czu Mertensdorf vnd den ongewell czu Heynczcendorf, der erber vrawen Anna, Heinriches Weisses elicher haws vrawen mit allem rechte, mit allir herschoft; domete zu tuen vnd zu lossen vnd ouch irre geerben, czu vorkeiffen, czu vorseczen, czu vorvechssellen, czu vormiten vnd on eren nocz czu wenden, vie es ir vnd irre geerben allir fugeliste vnd bequemeliste geseien mag, nichtis usgenomen. Ouch hoth dy egenante vrawe Anna formunde gekorin, den strengen hern Kylian von Hugwicz, Hannus Maltwicz vnd Hannussen von der Bele, das se dy vrawe vorwasin, vorantwerten sollen vor dem rechte, vie ofte das not geschieht vnd vo sech das geburet. Des habe ich ongeseen ir allir gunst und bete vnd habe dy egenante ein hube leen gutes zu Mertensdorf vnd das angewelle zu Heynczcendorf von kunglicher gewalt vnd macht gereich(t) vnd gelangit der obgenanten vrawen Anna, irre elichen geerben vnd nesten mit allem rechte, mit allir herschoft, domete zu tuen vnd zu lossen vnd vie das vorgeschriben steet, nichtis vsgenommen. Des zu vrkunde vnd zu einer sichirheit habe ich mein ingesegile mit meines hern, des kunges, monne ingesegilin an desen briff lossen hangen, dy vs gehegter bank zu geczeuge sint gekorin; das sint dy erbern geczeuge Niclos von Pannewicz vnd Thamme Czerwicz. Gegebin zu Glocz of dem hawsse am nesten donrstage vor unser vrawen tag Lichtewaye noch Cristis geburth dreyczenhundirt ior dornoch in dem dritten vnd neunczegisten iore.

Or. Perg. An Pergamentstreifen die Siegel des Landeshauptmannes (ein vollständig dem der Stosche gleichen- des Wappen; Umschrift unleserlich in Folge des beschädigten Randes) und des Nicolaus von Pannwitz (Helmsiegel mit Büffelhörnern). Das dritte S. ist gänzlich zerstört.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.